“

Tawãwãhma akru ahiruri. Yas kwãsayo kapashturi.

”

“

Akarshkwa, ayekorta as chinatishki. Ayekórta toshpiri, pakerpíri, kwãsa warkiya.

”

“

Yãhparchikan Wa sonkwari.

”

“

Ke yuimeh, kahni kiwa teshki. Ĩma kaakirua sarashatahya, tawãwãhma ahiruriras.

”

“

Akarshki tesh niha, “Iñas ishkapiwa” tikii tawãwãh. “Cha’wawama ayeskira”. Atahtu’ma akarshki ke akira aryẽherpira.

”

“

Ekapeka aryẽhhuri. To’ tawãwãh ayekortara ehkii, kwãsa warki pakerpiriras.

”

“

Kwãsa warkima kaoyã pe’arkapershkerpika kiuri yekortama, akaõra kakire ishtaki tawãwãh ayekortara chemira.

”

“

Ayekorta yẽhuma “ohlak sonkwas tawakwa”, tikii atusra. “Arwã sonkwas achihi te’ki tawakwa.

”

“

Sonkwa tawapiyama, tatah tatikkra”. Akarshki, apaski tawãwãhma tikii: “Pamawa okuperishkiawĩ, peskwakwas ishti’kara akwa. ishtaku, teshkuwa”.

”

“

Akarshki, yar awãwãh apaski peskwakwa kabuh nei tõshki akan weshkina. Kapahni nẽchẽimã, wakashkan neteshki newa’kri. Pesh akwãsã asukuhtama.

”

“

Patasuwama munia kira, ohtia kira, ka’ku kira, cha’ kira, tewa’ko, siña atewa chehra achesh kirerpira ika tawãwãhma arñehpira. ¿Ikankii kirurisa pesh akato’ka? Arwãma siyã neũwẽhte’kra patawã amaskra te’kra. Aryẽhripichenma kortalerma yuku atewa achehra, yuku katuhera.

”

“

Kortalerma peshwatapa’ a’yo kaamkra. Ika arwãlerma ũskoyo awatapa’ aterskra. Ãchih purua kas kira, munia brikahkan, orkra, pekerpa, arkehra pishkra. Aña tishki abush, abush kiwa, paskra to’keruri akeshyã.

”

“

Kakirema achanama tarina pẽhtu, tarina apaski teshtwa chuitu ayã Wa sonkwa teshkuras, pesh kwãsã akuhta. Tawãwãhma patayãhyope yẽhi, kwãsa ari weshkeras. Akarshki tawãwãhma sirari, to’na yas aryẽhi, kwãsãrina kahkapashki.

”

“

Wartũki ayekórtara. Ikayama ikans apistii.

”