Le lapin et le tigre

Manihri u’ri

El conejo y el tigre

De la historia de Claudine Chamoreau

The rabbit and the tiger

“
Kayas yẽherma ã manihri u’ri. Akarshkwa, krisakwa tikii u’ manihra: “Piãpa piah piah piwaskoma”
”
“
To’ manihma achihiri. Tahyã artapukki a kore u’ manihra. “Manih, ẽketama pisukuha piãpa” tikii u’ya. “Uuuuhu, taãutihi”.
”
“
Tikii “Taãũtihi”, tikii “Taãũtihi, ẽketarpe ĩyãma, awriha akas paskawa”.
”
“
“Ã wakash atutu, atiakan wishiha akas achihi” tikii maniya.
”
“
“Paspahã, pama akariras, te’ku tarwarku” tikii manihya. “Aso kaspaspra, sukuhpra, ãpra” tikii maniya, akarshkwa.
”
“
“¿Piahsa?” tikii u’ya. Manihya paki, chẽuma to yuira kamas kiakwa. Asowayã mani to u’ paki. Awrihakan wishi achihi. Akreke yui akarwara chẽi.
”
“
“Awriha paspra, ãpra”. “Akarshkwa, tarwarku, aso tokku, ũrahpra” tikii manihya. ¡Akanasri! “Paspra ãpra” tikii u’ya. Tokkeriarin, tokkeriarin, tokkeriarin. Manihma toktihi arkasaeshkuras akarshkwa.
”
“
Peshwa u’ma aso tokyope, asopera neboni. Chiukan, neboni akan, ¡ah takore u’! ¿Ĩripikiusa takore u’? manihya tikii.
”
“
Manihma nei, sãmpara sukuhi, pe’ki. Akan manih kii, u’ achiukan saki. Akatishki asate’te’yã. “Ah, ¿ĩyo takaisa? taeĩnwa” u’ma wahni.
”
“
“Uuju ayã peshwakwas pikachwa amasparishkawa” manihya tikii. “Ama pama ayuira ta’kaya” u’ya tikii.
”
“
“Akarshki, aũnhkoti wahayã naawa, pehas napeka, pama tokku aku.” Manihya tikii. “Wahayã naa pehãs napeka pikatishpara aso apastipira maniya yẽhi.
”
“
Ama pehma pe’ti’ sikira pe’ki akaporki. “¿Ah ĩyo taporkisa?” “¿Ah ĩyo taporkisa? Pama warkoria”, tikii u’ya manihra.
”
“
“Warkwishtaria” u’ya tikii.
”
“
“Tawarku, warpe nawa” manihya tikii.
”
“
“Tokku akupe, tokku akupe, tokku akupe” manihya tikii. Manih nei, teshki, tõshki, te’tihi.
”
“
Akarshkwa kapanah, manihra neartapuki. “Ẽketa, pama ĩyã, pisukuhpa, piãpahã, piãpahã, kecha tarkasauriras, warkwas takauriras” u’ya tikii. Manih saas chwayã nei, akankah kiaki.
”
“
“Ẽketa, tauku u’” manihya tikii “ẽketa, ĩ sa akatahka akari”. “Ke wartishkawa, ĩñara akasteshkoma, ĩkukkama wartishpihã” manih tikii “ẽhĩ patamaschepihã”.
”
“
“Ĩma toshchepihã, tarwarku te’sukuhu” tikii manihya u’ra. “Pama archa pitapũnuras”.
”
“
Yari nei, sukuhi u’ya. “Kwau ĩketarpe naa” manihya tikii. “Tasma ke akiri tasah kiuras, akaõra akonapara, naawa” tikii manihyã.
”
“
Nei, te’tihi. Akasteshki, arkasei, manih toshki.
”
“
Akarshkwa u’ma ãyã a’ki, a’ki. A’kiteshki.
”

Éditrice :
Claudine CHAMOREAU

Dessinatrice :
Françoise COUISSIN

Responsable éditorial :
Martín DEL CASTILLO

Voix pesh :
Juana HERNANDEZ TORRES

Voix anglais :
Adam WEBBER

Voix français :
Fréderic DECOSSE

Voix espagnol :
Mauricio VALLARTA

Coordinateur numérique:
Bernard TALLET

Web-designer / Développeur:
Pierre GAILLARD

Animation :
Marie-Alix AYRAULT

Mentions légales

©Mexico, 2019 - ISBN 978-2-11-155554-9