“

Kris yekorta pok chiriwã kacharaha atahñã.

”

“

Takaskro as kawãski. Akreke to' korta pokma u' sewa akawaleri.

”

“

To' korta pokma apĩma “Wileri”. Pokro aõhleri. Ĩka akẽs takaskro kaũtro'tihere.

”

“

Akãshkwa kaũtro'ki, sa'akaoñã kakastoki. Kakii to' takaskrohi.

”

“

Ĩka akẽs aok te'ki, aska paki takaskroma tahpũkras.

”

“

Akreke to' askayoma ishti.

”

“

U'sewa as neboni takaskroyo anu'kerpiro.

”

“

Takaskroma aparñã sukuhi, kabriñã misbarki.

”

“

Ĩkãkẽs warki te'tihere, u' sewa te'ki ú' pawãro papiro.

”

“

Añã arnu'kri, arnu'kermã takaskroma chã'tahri.

”

“

Akãshkwa takaskro neboni, warki aparñã sukuhi ĩkã akasnetihere. To' takaskro kabriñã miski, u' pawãma ĩñã ishtina.

”

“

Tikimi as takaskro akoaro toki ũtro'piro. Tikimima takaskro akaoñã toki akoaro ũtro'piro. Takaskro aiñãh prohwamã pãstiri. Akãshkwa takaskroma ke arnu'tihi ĩkẽ akoa atapunaras.

”

“

Ĩkãkẽs aok warki netihere sa'akaoñã apacha kakaspaspiro. To' aokma takaskroyo arosãyo arnu'ki.

”

“

Arosãma kasurustakenai, anu pispistai. Akreke arosãma artoktihi. Arkatehi, arkatehpẽ, wreshki.

”

“

Takaskroma sá'akaoñã ẽhi.

”

“

Akãshkwa ao'kma toki sá'akaoñã. Ãñã kawaskumã apachama ke bokileri. “ Ikãshkwa piwapahasa ?” tikakihĩ to' arwã tapunai.

”

“

Akãshkwa tikakihĩ : “ Tatah anũ'ã akuhwa !”

”

“

Apacha pokma ãñaweshkiri. Ãñã tõshkineri. To' arwã tapuhnama apĩma “ kakuri ”. Ĩ akayama ĩcha' apisti kiwa.

”